أنا وزانجتسو..!

بسم الله الرحمن الرحيم

صديق عزيز بجد، معايا طول الوقت زي ظلي، مش إنسان ولا حتى كائن حي، لكن العلاقة بيننا أعمق وأقوى من الصداقة..!

مين هو ده؟؟ هو موبايلي العزيز زانجتسو، المعروف رسمياً وعند كل الناس ما عداي باسم (نوكيا N95)!

زانجتسو Zangetsu (للي مش فاكر) اسم شخصية من مسلسل أنيمى بـلـيـتـش Bleach المفضل عندي، وهو اسم سلاح بطل المسلسل (إيتشيجو كوروساكي).. سميته كده لأنه زي زانجتسو الحقيقي، قوي وحازم وصاحب صاحبه ومتعدد الاستعمالات، وفوق ده كله فضي زي السيف! ^^

تلقيت العزيز ده من حوالي 7 شهور من الوالد الله يرحمه، ومن ساعتها بدأت علاقتي القوية بيه..! وناس كتير (أصحابي أو غير أصحابي) ممكن تستغرب أنا ليه أساساً تاعب نفسي وكاتب التدوينة دي عن موبايل! الحقيقة أنا مش بعتبر زانجتسو مجرد موبايل أبداً.. استعملت قبله حوالي 3 موبايلات مختلفة على مدار أربع سنين، ما ارتحتش ومحبيتش منهم أي حاجة أكتر من ده، لأنه عملي جداً وميزاته أكتر من إني أذكرها هنا.. وعشان كده العلاقة اللي قامت بيني وبينه بقت قائمة على التفاهم والتواصل والطاعة..!

إزاي يعني؟ زانجتسو معايا دايماً زي ظلي، بستعمله كهاتف ومشغل موسيقى وكاميرا ومشغل فيديو وقارئ للكتب الالكترونية وعارض للصور ومتصفح ويب ومنبه وأحياناً للجي بي إس والألعاب، فطبيعي جداً إني أكون اتعودت عليه وبقيت بفهم هو محتاج إيه من غير ما يقول أحياناً كما إنه غالباً مطيع ولذيذ مع إنه ساعات بيستعبط ويهنج أو يبطأ أو حتى ميرضاش يسطب برامج >.<

وزي ما هو بيخدمني كتير أنا بخدمه على قد ما أقدر، بعتني بنظافته وبشيله في جراب خاص (ودي عمري ما عملتها مع أي موبايل قبله، اللهم إلا الكوفرات ^^") وبشحنه مجرد ما ينقص شُرط (لأن أساساً بطاريته بتخلص بسرعة ^^") وبحاول ما أرهقوش على قد ما أقدر سواء في الاستعمال أو المساحة حتى لو كان متوافر مساحة كبيرة عليه.

التواصل بيني وبينه بيؤدي أحسن شغل فعلاً! لما أوحد جهدي مع جهده (في التصوير بشكل خاص) بندي أفضل نتيجة ممكنة، ومحدش بيعرف يستعمله زي العبد لله خاصة في التصوير!

مع كل ده مقدرش أبداً أعتبر زانجتسو مجرد أداة أو جهاز عملي جداً.. هو صديق مخلص وعزيز عليا ومعايا دائماً ومؤنس لوحدتي، ومساعد قدير وقوي فعلاً ما شاء الله عليه.. يمكن أنا غريب أو حتى أظهر للبعض إني مجنون عشان بحب جماد وبعتبره صديق بس ما أقدرش أمنع نفسي من كده.. يمكن وجود زانجتسو بيخفف شعور الوحدة الدائم عندي من ساعة وفاة الوالد الله يرحمه، وبيفهمني وبيطيعني بلا كلل والشهادة لله.. ورغم وجود حاجات أفضل وأقوى منه حالياً إلا إني سعيد جداً بيه ومش هرضى بغيره بديل (وحتى لو رضيت مش هقدر أشتريها أساساً ).. للناس فيما يحبون مذاهب يا جماعة ^^"

وربنا يخلينا لبعض يا زانجتسو العزيز