يوم التأخير العالمي!! (يوم من عمر العبد لله)

بسم الله الرحمن الرحيم

النهارده فعلاً كان يوم من عمر العبد لله! أقصد هنا إنه كان يوم طويل ومتعب لأقصى درجة والحمد لله! مع إن النهارده كان الخميس اللي هو المفروض أريح يوم في الأسبوع في الأيام العادية، لكن مين قال إن الأيام دي أيام عادية؟!! اليومين دول إحنا في أيام استعداد لإمتحانات العملي ومن بعدها النظري!!

 

المهم..طبعاً مستغرب العنوان (يوم التأخير العالمي) وهو فعلاً اليوم ده جدير بهذا اللقب!

نزلت عليا سَكينة غريبة النهارده فمصحيتش إلا 7 وربع قبل معاد كورس الدكتور بدوي بربع ساعة بالضبط!! طبعاً قمت لبست ونزلت جري عشان ألحق الكورس..ركبت مع سواق تاكسي ما شاء الله متسامح مع الحياة أوي وماشي براحة راحته لحد ما وصلت الكورس على 8! مع إني كنت متأخر وكاره نفسي عشان تأخيري ده لكن سامحت الراجل المرة دي وأجلت تحطيم رأسه لحد ما أركب معاه في وقت تاني إن شاء الله!

الدكتور بدوي طبعاً خلص براحته أوي هو كمان فأتأخرت عن كورس الدكتور سامح 10 دقائق بس لحقت قبل ما يبدأ شرح الحمد لله..خدت حصتين واحدة إمبريولوجي وواحدة عملي. يا دوب خلصت عنده رحت ع الكلية جري ألحق سكشن الهستو (جبنة نستو) زي ما أنا مسميه (!) وقعدت فيه ساعتين..! كنت عاوز أطلع بدري عشان ألحق كورس العملي عند الدكتور بدوي لكن مش راضيين أبداً!! آل إيه محدش هيطلع لحد ما نجمع كل شرائح العملي! آل يعني خايفين تتسرق..تقولش إلا كنا هنسرق منهم دهب يعني؟!

المهم انطلقت من السكشن جري عشان ألحق الدكتور بدوي، وكان شكلي بصراحة زي الزفت وأنا بجري كده في القسم (!) لكن يالا مش مهم..رحت الكورس جري ألاقي الدكتور لسه مبدأش..!! (يا خرااااااابي الراجل ده عاوز يجننييييييييي!! رايح له جري ألحق الحصة وفي الآخر ألاقيه لسه مبدأش؟!!)

قعدت حصة عملي حوالي 3 ساعات مليئة بالكثير من الأشياء مش أبسطها طبعاً رائحة الكيماويات في (معمل) الكورس واللي كانت هتخنقني لدرجة إني بقيت بكح لحد ما كنت هكح رئتيّ D:

لكن أهو يوم خلص وعدى على خير والحمد لله..

لكن بصراحة كل اللي حصل النهارده خلوني أفكر في موضوعين كده:

1- المواعيد..! سبحان الله تقريباً مش شايف حد في البلد دي بقا بيحترم المواعيد لسبب ما، حتى في الكلية اللي مفروض دكاترتها ومعيديها يكونوا قدوة للطلاب في الالتزام بالمواعيد! كل واحد بيبدأ براحته وبيمشي براحته وبيخلص براحته وكأن اليوم 48 ساعة مش 24!! مش غريب طبعاً إن البلد في الحالة دي اللي ما يعلم بيها إلا ربنا..إزاي عاوز بلد يكون محترم ومتقدم وشعبه أساساً مبيحترمش المواعيد وبيشيلوا الساعات في إيديهم لمجرد المنظرة أو لإشباع عقدة نقص..؟!

2- سمعت النهارده إن سكشن 2 سنة تانية هيتم عقابهم كلهم بسبب حادث حصل يوم الاثنين الماضي من سرقة وتكسير لشرائح عينات الهستولوجي..وأكيد هو ده سبب منعهم لينا من الخروج قبل تجميع الشرائح كلها خوفاً عليها من حدوث ما حدث..

اللي ضايقني في الموقف مش التأخير بصراحة..ضايقني عدم اهتمام الطلاب نفسهم بالأمانة وعدم مراعاتهم ليها..الكلية مسلمانا الشرائح دي عهدة وأمانة عشان نشوفها ونتعلم منها ونستفيد ونفيد بعضنا، ونحافظ عليها سليمة عشان غيرنا يستفيد زي ما إحنا استفدنا..يقوم شرذمة من الناس بتضييع الأمانة دي ببساطة كده، لمجرد إنهم عاوزين يحتفظوا بالفائدة لنفسهم أو بسبب إهمال منهم؟!

وطبعاً ده سبب من أسباب كون البلد في الحالة دي اللي ما يعلم بيها إلا ربنا..! وربنا يستر، ويرفع عنا البلاء والمحن…!!!

 

وبالتوفيق للجميع إن شاء الرحمن، ودعواتكم لينا بالتوفيق يا شباب :)

شكراً..

 

محمد الوكيل

16 من إبريل 2009 مـ

20 من ربيع الآخر 1430 هـ

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s