للتاريخ والمستقبل..لا أكثر

بسم الله الرحمن الرحيم

النوت أو البوست دي تقدر تعتبرها تفريغ لشريط تسجيل كبير سجل أهم الأحداث والحاجات اللي حصلت للعبد لله الفترة اللي فاتت كلها، خاصة من يوم 4 يوليو 2009م، كتبتها للتاريخ وللمستقبل بإذن الله..ولو مهتم بالقراءة اتفضل ولو مش كده أكيد ما أملكش الحق في إجبارك على القراءة ^^:

1- وفاة والدي..حدث يوم 4/7 الساعة 7 مساءً بالتحديد..أقدر أقول بكل ثقة إن ده كان أهم حدث حصل لي الفترة اللي فاتت وربما طول حياتي لحد الآن..الوفاة حصلت في المستشفى قدام عيني ولا أظن إني أقدر أنسى المشهد ولا اليوم ده أبداً ما حييت لحد آخر عمري، رغم إن العلاقة بيننا مكانتش أد كده ورغم إنه كان بعيد عنا لفترة بسبب سفره، لكن برضه الموقف والأمر كان صعب، والحمد لله اللي قدرنا وأعاننا على الصبر..

2- رسوبي في 3 مواد في الدور الأول في سنة ثانية..حدث يوم 7/7 بعد عودتي من العزاء مباشرة، كان موقف صعب أوي ساعتها وكان هيحطمني نفسياً جداً خاصة بعد الضغط الشديد اللي كان عليا طول الشهور اللي فاتت بسبب مرض والدي، ولأني بكره الفشل جداً، لكني تغلبت على الموقف بفضل الله وقررت أمضي وأنجح في المواد دي تحديداً في يوم 8/7، وبإذن الله مش هييجي شهر سبتمبر القادم إلا وأنا في سنة ثالثة طب إن شاء الله تعالى..

3- اكتشافي لأمور كثيرة جداً واكتسابي خبرات ما كنتش هقدر أكتسبها إن م�انش اللي حصل ده حصل:

أ- اكتشفت إن ورايا إخوة وأصدقاء مقدرش أبيعهم بمال الدنيا كله..هما ليا أكثر من الإخوة، وقفوا جنبي ساعة العسرة وساندوني وضحوا براحتهم وبوقتهم الثمين عشاني..وأظن إني حتى لو قضيت حياتي أحاول أرد لهم جميلهم مش هقدر أبداً، عشان كده أكتفي بـ: شكراً لكم جميعاً، للأبد..حتى اللي مقدرش منكم ييجي لأي سبب كان فمفيش مشكلة أبداً، وجزاكم الله خيراً جميعاً..

ب- اكتشفت إني أقوى مما كنت أتخيل! عندي قدرة غريبة على التحمل والجلد والصبر في المواقف الصعبة، بل وتجاوزها بسرعة كبيرة والمضي قدماً..كنت بفضل الله أكثر شخص في الأسرة تماسكاً لما حصلت وفاة الوالد، وبحمد ربنا على ذلك حمداً كثيراً..

ج- اكتشفت -للأسف- إن الغدر أحياناً ممكن ييجي من أقرب الناس، لإن المواقف الصعبة فعلاً زي النار اللي بيمتحن الذهب، وللأسف فقدت الثقة في ناس كتير من حولي ما عدا أسرتي وإخواني الأعزاء من أصدقائي..جزاهم الله جميعاً كل خير..

د- اكتشفت وحسيت بحمل المسؤولية الملقاة على كاهل راجل البيت..! رغم إن المسؤولية دلوقت أكيد ما كانتش زي مسؤولية الوالد الله يرحمه، لكنها رغم ذلك ثقيلة ومتعبة، والله المستعان..

هـ- اكتشفت إن حتى الإيمان بالله ممكن يضعف أحياناً، وإنه زي الجسد البشري محتاج عناية وتغذية مستمرة عشان يفضل قوي ومتماسك..

و- اكتشفت إن الحياة بتستمر..بتستمر ومش بتقف لموت حد أو لحياته..الحياة بتستمر وهتستمر إلى أن يشاء الله رب العالمين..كلنا وكل أعزاءنا وأحباءنا إلى زوال وفناء، حتى رسول الله صلى الله عليه وسلم اللي أعز علينا من أهلنا وأباءنا وأبناءنا مات، ورغم كده الحياة استمرت والإسلام استمر حتى يومنا هذا وإلى أن يشاء الله..من حقنا نحزن ومن حقنا نبكي لفقد الأحباء، لكن مش لطول العمر، لأن البكاء عمره ما بيرجع ميت وعمره ما بيدفع حد للأمام أبداً..

4- تغير حاجات كتير في شخصيتي..صرت صبور أكثر رغم إني بتعصب أحياناً، وصرت أكثر حملاً للمسؤولية وتقديراً لها، وحاجات تانية كتير..

5- حصولي على موبايل n95 جديد ولله الحمد! وهو لعمر الله حدث مهم بالنسبة لي، ربنا يحفظه ويحميه ويديمه نعمة ^^

أعتقد إن دا كل اللي الشريط سجله لحد الآن..أتمنى إني مكنتش سببت لك إزعاج في القراءة، ودعواتك ليا بالتوفيق والسداد إن شاء الله :)

شكراً..


With Windows Live, you can organize, edit, and share your photos.
Advertisements

One thought on “للتاريخ والمستقبل..لا أكثر

  1. كلام جميل من إنسان جميل ، بتفكرنى بقول الشاعر :جزى الله المصائب كل خير ******** عرفتنى عدوى من صديقى !والإنسان السليم هو الذى يحول كل المواقف – بخيرها وبشرها – لصالحه دائما !! أخوك محمد صلاح قاسم

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s