عن النصب الإلكتروني أتحدث..!

بسم الله الرحمن الرحيم

أكيد كتير منا قرأ عن حوادث نصب وسرقات إلكترونية كانت بتحدث لأشخاص عديدين في أوائل القرن 21 خاصة لرجال الأعمال، لأن أيامها كان النت ما زال ضيف جديد في بلدنا مصر ومكنتش الناس تعرف مخاطر النت وبلاويه!
وكان العبد لله -بصفته مهتم جداً بالنت وبكل شئ متعلق به- مهتم يسمع عن الأمور دي ويعرف عنها ويتجنبها قدر المستطاع، إلا إني في قرارة نفسي كنت أظن إن الكلام ده كله كلام "مجلات كمبيوتر" وخلاص..لحد ما جربت واتعرضت لكده بنفسي!!

من فترة تلقيت على موقع TestQ وهو موقع عليه اختبارات شخصية متنوعة زي اختبار IQ وخلافه، تلقيت عليه رسالة خاصة من عضو أو عضوة يدعو نفسه Kathleen Johnson يطلب صداقتي..! طبعاً الأمر كان مريب لأن أنا محدش يعرفني على الموقع ولا أنا مدير أو عضو نشط فيه! المهم قبلت الموضوع وضفت صاحب العضوية عندي في إيميلي ونسيت الموضوع فترة، لحد ما فتحت الإيميل ولقيت الشخص ده أون لاين قلت أفتح معاه كلام..

لقيته (لقيتها بمعنى أصح) بتقول إنها لاجئة من الصومال هربت لتوجو (دولة أفريقية في غرب أفريقيا) في معسكر لاجئين هناك، وبعدين لقيتها بتقول لي إنها عندها ثقة فيّ وإنها عاوزة تكشف لي عن سر خطير ومهم جداً!! طبعاً الأمر بدا مريب جداً خاصة وإن ده أول حوار بيننا ومستحيل تثق فيا فجأة كده من مجرد مكالمة مسنجر!

المهم لقيتها بتقول لي الآتي: إنها بنت واحد محافظ (أو نائب محافظ) لمقاطعة صومالية اسمه (حسين رونو شيخ) وهو شخص حقيقي بالمناسبة، وإن واحد من رؤساء الصومال السابقين اسمه (عبد الله يوسف) اغتاله رمياً بالرصاص، وإنها بنته لكن مختفية في معسكر لاجئين هرباً من زوجة أبيها (!) اللي عاوزة تستولي على الأملاك اللي تركها لها والدها المتوقي في البنوك (حوالي 3 مليون دولار!!!)..
وعشان كده وثقت فيا وعاوزاني أنا العبد الفقير إلى الله أساعدها في الهرب من توجو والمجئ لبلدي عشان تدرس وتستثمر أموالها بمساعدتي…!!!!

على فكرة الأشخاص المذكورين (حسين رونو شيخ) و(عبد الله يوسف) أشخاص حقيقيين تماماً ويمكنكم التبحث عنهم في النت..لكن بالنسبة لبنت حسين رونو دي الأمر بدا إنه عملية نصب ذكية جداً! وأنا كنت تلقيت رسائل مشابهة تماماً فيها استعطاف للمتلقي لغرض في نفس يعقوب، لعلم المرسل إن المتلقي مش هيقدر يرفض طلب زي ده..
لكن الحمد لله هداني إني أعمل بحث سريع في النت عن الموضوع ده بينما الحوار دائر..ووجدت إن نص الرسالة الي وجهتها لي وبتطلب مني فيها الطلب الغريب ده موجود هنا:

http://fishyartsandwords.blogspot.com/2009/06/blog-post_15.html

وبتطلب من الشخص صاحب المدونة الطلب نفسه..! وصاحب المدونة بيقول إنه تلقى الرسالة على إيميله وإنها نصب واضح وبين -حسب ما هو باين من الكومنتات تحت البوست!- ولقيت الكلام نفسه اللي مكتوب في البوست هو نفس الكلام اللي بيتقال لي بالحرف الواحد والله العظيم على ما أقول شهيد!!

ولما واجهتها -أو واجهته- باللينك ده قالت إن ده من فعل زوجة والدها!! طبعاً كلام ميدخلش عقل بني آدم!
نهاية الحوار إني رفضت المساعدة بكل تهذيب وأنهيت الأمر وإنها بقت أوفلاين!!

ببساطة شديدة واضح إن الأمر كله مجرد نصبة كبيرة ليس إلا! وصندوق المحذوفات Junk Mail عندي مليان رسائل مشابهة، وكلها -الغريب جداً!- بتكون عناوينها بحروف كبيرة (كابتال) وبتكون كلها استنجاد وطلب استغاثة!!

يا ريت يا جماعة تحذروا من الحوارات دي ومتصدقوش أي حاجة توصلكم في الإيميل أو بأي وسيلة أخرى يكون مضمونها مشابه للرسالة دي..

وشكراً جزيلاً :)

محمد الوكيل

 

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s