من بعد امتحان الفسيولوجي..! (يوم من عمر العبد لله 3)

السلام عليكم ^^

اليوم 13/8 كان يوم امتحان الفسيولوجي في الدور التاني >.< ذكرى محبش إني أتذكرها كتير رغم إن الامتحان كان كويس الحمد لله، لكن برضه محبش أتذكر أصلاً إني كان عندي دور تاني، وأكيد فاهم شعوري :D

المهم، كان معايا في الامتحان –ولأول مرة من فترة- العيص والشريف..كانوا مأجلين المادة طبعاً مش شايلينها زي العبد لله :D ووجودهم الصراحة كان مصدر بهجة اليوم كله! الواحد مش بيشوف العيال الأوغاد دول كل يوم طبعاً! فالمهم اتفقنا على مرواح سينما عشان ندخل فيلم (طير إنت) بتاع أحمد مكي، وبصراحة كنت متحمس جداً لسببين: إني بحب أحمد مكي أصلاً جداً وكان نفسي أشوف الفيلم من زمان، وإني مدخلتش سينما بقالي سنين وهتبقا تجربة ممتعة أكيد لما أدخل مع أصحابي مش مع عمتي الله يرحمها زي المرة اللي فاتت XD

بعد كده رجعت البيت قعدت على الجهاز شوية كده عشان أكمل فيلم فل ميتال ألكمست Full Metal Alchemist اللي مكنتش كملته..المسلسل ده كله على بعضه كان بصراحة كنز مدفون مكنتش مكتشفه، وكنت في الأول بكابر عشان ما أشوفوش عشان بعض النقاط اللي يمكن تتناقض مع العقيدة في مسار القصة، لكن هو فعلاً كدراما وقصة ومعارك ممتاز وتجربة لا تنسى..

 

خلصت الفيلم وكان تجربة مميزة ورائعة كعادة فل ميتال ألكمست، وبعدين أجريت اتصالاتي <<< عاوز أحسسك إني مهم أوي يعني :D مع العيص والشريف عشان أشوف نظام السينما وكده، عشان أكتشف إنهم فجأة قرروا يلغوا مشروع السينما ويقعدوا في كافيتريا فندق بانوراما اللي فوق السطوح! هي مكانتش فكرة سيئة أوي يعني خصوصاً وإن القعدة فوق ملوكي والمشروبات اللي هناك لا يُعلى عليها، لكن كان نفسي أروح سينما T.T ما علينا..

رحت لقيت العيص والشريف وجيمي (جمال ^^) وسامي، ومعاهم إخوات العيص عمرو ومحمود..! ومحمود ده لوحده كان فاكهة اللقاء بلا منازع! عنده 5 سنين وشقي شقاوة رهيبة وبيكره إنه يقعد هادي وساكت زي البني آدمين! لكن "عسولته" هي اللي خلتني أسامحه بصراحة :D

قعدنا حوالي ساعة ونزلنا..كانت قعدة فعلاً زي العسل خاصة وإن الواحد كل فين وفين لما يشوف العيال دي والله :) وطبعاً منسيناش كالعادة نلقط شوية صور ع الماشي ^^

 

  

 

 

 

 

 

 

 

 

 

 

 

 

 

 

 

 

مش عارف أنا ليه بطلع في الصور وشي مايل أوي كده!! بس على فكرة الصورة اللي أنا مش ظاهر فيها متصورة بموبايلي شخصياً! (طبعاً لازم أتفشخر شوية XD) وكان فيه صور تانية بس كانت كلها متكررة وحذفتها..

بعد ما خلصت المشوار الكفاءة ده عديت على واحد صاحب بابا الله يرحمه بدعوة منه قعدت معاه شوية لحد قبل 12 كده وبعدين رجعت على هنا وكتبت التدوينة دي ^^

 

بس الخلاصة يعني إنه كان يوم حلو أوي ولله الحمد..والعبد لله على فكرة مش بيكتب تدوينة عن أي يوم إلا لو كان فعلاً يوم مميز ويستحق إني أكتب عنه، وده من الأيام دي!

وأرجو من الله إنه يديم إخوتنا وصداقتنا للأبد بإذن الله رب العالمين ^^

 

وإلى اللقاء في يوم آخر إن شاء الله :)

 

محمد الوكيل

Advertisements

One thought on “من بعد امتحان الفسيولوجي..! (يوم من عمر العبد لله 3)

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s