رائع: مقالي الأول في مجلة بحلقة الإلكترونية!!

بسم الله الرحمن الرحيم

 

بفضل الله والحمد لله نُشر لي اليوم مقالي الأول في مجلة بحلقة الإلكترونية والتي يرأس تحريرها كريم الشيخ ويحررها مجموعة من شباب الصحفيين الطموحين من مختلف أنحاء مصر :) ولله الحمد انضم العبد لله لفريق تحرير المجلة وأتمنى من الله تعالى أن لا أخيب ظنهم ولا ظنكم :)

 

وها هي وصلة المقال:

http://b7l2a.net/monw3at/1533.html

 

نص المقال:

 

* أنيمى.. يعني إيه؟

كتير من الشباب متصفحي النت يعرفوا أو يسمعوا عن نوع من مسلسلات أو أفلام الرسوم المتحركة اسمها أنيمى Anime، وبيخلطوا بينها وبين الكارتون أو الرسوم المتحركة الأمريكية بطريق الخطأ، وده غير صحيح تماماً!

الأنيمى Anime مصطلح بيشير إلى الرسوم المتحركة اليابانية أو المصنوعة في اليابان، وهو اختصار ياباني لكلمة أنيميشن Animation الإنجليزية، وفيه أقوال ترجح إنها كلمة فرنسية الأصل بسبب نطقها القريب للفرنسية. في اليابان المصطلح ده بيرمز بيه لأي رسوم متحركة بصفة عامة، بينما خارج اليابان (وخاصة في كثير من القواميس الإنجليزية) بيقصد بيه الأنيميشن الياباني بصفة خاصة وإن كان الأمر بيختلط على بعض الأشخاص فبيسموا أي رسوم متحركة أياً كان أصلها (أنيمى) زي هنا في مصر مثلاً. وبعض الأشخاص بيفضلوا يطلقوا المصطلح ده على الأنيميشن الياباني الخالص ومش بيعتبروا أي عمل كارتوني بإنتاج مشترك بين اليابان ودول ثانية أنمي (مثلاً أوبان ستار ريسرز Oban Star Racers).

بدأ ظهور الأنيمى في الدول الغربية على استحياء وكان في البداية اسمه Japanimation كنوع من التلاعب بالألفاظ، بس المصطلح ده اتنسى وظهر بداله المصطلح الحالي Anime، وده محصلش إلا من حوالي 17 سنة تقريباً أيام ما بدأ الأنيمى يظهر بقوة على الساحة وينتشر بره حدود اليابان..

وكان الأنيمى اللي ابتدا من بعد ظهوره انتشار حب الأنيمى هو فيلم (أكيرا Akira).. وده رغم إنه مكنش ذو شعبية كبيرة في اليابان إلا إنه لقى ترحيب شديد من الجمهور الأمريكي خاصة واللي بدأ يظهر عنده جنون الأنيمى من بعدها! فظهرت أعمال أنيمى أكتر وبقى الأنيمى بوابة خاصة جداً للغرب للتعرف على اليابان وفنونها بشكل أفضل. وعن طريق الغرب خاصة أوروبا بدأ الأنيمى يوصل لعالمنا العربي ويزدهر وجوده هناك بل وبقا جزء مهم في وجدان جيل كامل ولحد دلوقتي.. ومن أشهر أعمال الأنيمى اللي ظهرت في العالم العربي طبعاً (مازنجر Mazinger Z) و (كابتن ماجد Captain Tsubasa) و (دراجون بول Dragon Ball) وحالياً (القناص Hunter X Hunter) و (يوجي يو Yu-Gi-Oh!) و(كونان Detective Conan) وغيرهم.

والأنيمى –عكس ما ناس كتير فاكرة- مش موجه للأطفال وبس، ده له أنواع وأشكال وأساليب كتير جداً، وموجه لكل الفئات تقريباً (أطفال ومراهقين وشباب وبالغين وراشدين!) ويمكن أعمال الأنيمى الموجهة للأطفال كميتها ما تساويش حاجة خالص أمام الأعمال الموجهة للفئات التانية! وكذلك تاريخه طويل وثري وأنواعه وأشكاله كتيرة جداً هنتكلم عنها ببعض التفصيل في الأعداد الجاية

 

وشكراً ^^

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s