ركن من العالم أدعوه نفسي.. مرة أخرى..

بسم الله الرحمن الرحيم

Mike20Sol_Storm20Of20Sadness20

قررت المرة دي أتكلم عن نفسي، لنفسي ولبعض الأثيرين من أصدقائي وزملائي، محاولة يائسة لاستعادة سلامي النفسي وتوازني ولترتيب أوراقي وأفكاري.. قررت كمان إني أتخلى عن كبريائي الزائف شوية وأتكلم بالعامية عشان أتحرر بعض الشئ من قيود اللغة وأعبر بحرية أكبر..

 

-اسمي محمد عبد العاطي الوكيل، 20 سنة وقت كتابة التدوينة دي، إنسان مسلم مصري عربي وفخور بإني كده مهما حصل.. طالب بكلية طب طنطا وقارئ قديم ومدوِّن من زمان وكاتب قصة قصيرة ومترجم قصص قصيرة، ومتابع ومحب للأنيمى والمانجا بجنون (!) ومهما كان برضه.. بحب القراءة خاصة القرآن الكريم ثم المانجا ثم القصص القصيرة والرباعيات الشعرية ثم الروايات، والتدوين والكتابة والترجمة، ومشاهدة الأنيمى طبعاً..!(ناس كتير انتقدوا على النقطة دي وما زالوا، وأنا مصر على موقفي ^^)، وسماع الأغاني الهادية أو على الأقل المحترمة اللي مفيهاش عيب.

 

– هادي نوعاً ما، محب للسلام والهدوء جداً إلا إني بحس بالوحدة مع الهدوء المفرط.. مرح جداً ومبتسم ببلاهة أبدية! وأحياناً بتمنى أغير الجانب ده مني لكن ناس بينصحوني أستمر كده..! متطرف في مشاعري بعض الشئ، وقت الفرح بفرح جداً ووقت الحزن بحزن بشدة..

 

-بحب الله سبحانه لأسباب أكثر من إني أعدها، وبحب النبي عليه الصلاة والسلام أفضل قدوة.. بحب أسرتي وبحب أصدقائي وبعتبر حياتهم ناقصة وغير قابلة للاستمرار من غيرهم، لأنهم أسرتي الكبيرة اللي اخترتها بنفسي وعشت معاها أحلى أوقات الشباب، وعاشوا هما معايا أحزاني قبل أفراحي وساندوني ودعموني حتى بمجرد إنهم بقوا أصدقائي..! ونفسي أحميهم كلهم وأقدر أرد لهم كل جمايلهم عليّا ولو مقدار ذرة..

 

-بحب صنيع المعروف وبقدر اللي بيقدم لي معروف ولو صغير.. في حالة شكر دائمة لكل الناس تقريباً (!) وحالة أسف دائمة برضه.. يمكن هي شعور بالذنب لأني بتمنى أرد لكل من قدم لي معروف معروفه ده أضعاف مضاعفة وبعجز غالباً..

 

-بحب أطلق قلمي بلا حدود وأطلق مشاعري بلا حدود ومش بحب أحبسها أبداً ومش بقدر أصلاً.. الإنسان اللي بحبه وبحترمه بيبان من شكلي وطريقة كلامي معاه إني بحبه، واللي مش بحبه نفس الكلام..! بحب الكتب الممتازة اللي فيها أفكار ممتعة ومفيدة جداً وبحب الحكمة والعقل الرزين والأفكار المنظمة الراقية والتعبير عنها برقي حتى وإن كان مضادة لأفكاري.

 

-بحب الحياة عامة بكل أشكالها، عارف إنها مصيرها لنهاية بس بحب أستمتع بها وأقدم للناس ولنفسي أكبر فائدة ممكنة قبل ما أموت إن شاء الله.. بحب الكائنات الحية بكل أشكالها وشايف إن كل واحد منها فيه ولو لمسة جمال بسيطة، حتى الثعابين والأسود والكلاب..!

 

-بكره الشر والقتل بدون حق والدم والحزن والكراهية نفسها.. بكره البغضاء والنزاع والحرب وبتمنى تتوقف للأبد مهما كان سببها.. بكره الظلام رغم إني شايف إني ممكن أحوله لقوة حقيقية مفيدة..

 

– لله الحمد: عندي أصدقاء كتير جداً ونفسي أفهم ليه وإزاي، بجد! بلاقي ناس كتير منهم متمسكين بيا وبصداقتي أوي، ومقدر لهم ده كله فعلاً لكن نفسي أعرف إيه الشئ اللي مخليهم كده أصلاً. مش شايف في نفسي شئ مختلف أو جديد أو حاجة مميزة لده كله..

 

-عندي قدرة ما على إني أقرأ شخصية اللي قدامي.. فيه شخصيات كتير مش بعرف أسبر أغوارها رغم كده.. بستمتع بقراءة شخصيات غيري عشان أقارن بينها وبيني وأحاول أخلي شخصيتي أحسن..

 

– حاسس إن فيه جوايا وتحت جلدي شخصية وروح أخرى غير اللي الناس كلها عارفاها وشايفاها.. شخصية عكس شخصيتي تماماً ويمكن هي (النيجاتيف) بتاعي.. رغم كده حاسس إنها شخصية أفضل نفسي أكونها.. واكتشفت إنها مش بتظهر وتسيطر غير لما الأدرينالين بيزيد في دمي لدرجة كبيرة..! في نزاع دائم وأبدي مع الشخصية دي عشان حد مننا يسيطر.. رغم كده بحاول أحول جانبي الآخر ده لقوة أشق بها طريقي الحياة.. (ده بيفكرني بشخصية إيتشيجو كوروساكي Ichigo Kurosaki من أنيمى بليتش بالمناسبة!)

– بحلم إن الحزن يتلاشى من العالم.. إن الحرب تنتهي.. إني أقدم لكل اللي ساندني ودعمني طول عمري شكر لائق بكل اللي عمله عشاني.. إني أكتب أفضل حاجة وأشوف أفضل أنيمى وأقرأ أفضل كتاب كتبه بشر وأسمع أفضل فكرة.. بحلم إني أكون حر فعلاً فلا يقيدني شئ إلا إرادة الله وطاعتي ليه.. بحلم أحياناً إني أشيل سيف وأقاتل خصوم وهميين بكل قوتي لحد ما أنتصر أو هما ينتصروا مش فارقة.. بحلم –وده الأهم- إني أغير العالم! أغيره في أي مكان هكون فيه وأي مجال هشتغل فيه وبكل قوتي..

 

– بصراحة لو كملت كلام مش هخلص وإنتم زمانكم زهقتم بصراحة وأنا كمان عندي كورس كمان شوية ^^" وعلى كل حال أشكركم بجد لاهتمامكم بالقراءة ولاهتمامكم بشخص العبد لله أصلاً! ^^ يمكن في مرة أكمل اللي كتبته ده إن شاء الله.. ربنا يسهل ^^"

 

شكراً..

 

محمد الوكيل

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s