عن احتفال مجلة بحلقة العزيزة بعيد ميلادها الثاني (يوم من عمر العبد لله)

بسم الله الرحمن الرحيم

24937_380311261829_151907356829_5337359_419710_n

بما إن العبد لله واحد من المحررين في المجلة الجميلة دي، مجلة (بحلقة)، قررت حضور احتفال المجلة بعيد ميلادها الثاني في حديقة متحف محمود مختار بالقاهرة أمام دار الأوبرا المصرية، وقد كان! ^^

انطلقت من طنطا –أم الدنيا طبعاً ^^- بقطار الساعة 9 إلى القاهرة، قعدت شوية كويسين في استراحة المحطة (اللي الشاي فيها كومبليت وطبعاً بـ6 جنيه :D) وبعدين لقيت الوقت بدري أوي ومكنتش هألاقي حد في الحديقة لسه، فركبت المترو (بحبه أوي على فكرة ^^") ونزلت محطة التحرير واتمشيت شوية في وسط البلد.. لسبب ما باحس إن المكان ده في النهار مختلف عنه بالليل.. بالنهار باحس فيه أنس ودفا وبيتلاشى عندي شعور الوحدة والاغتراب إلى حد ما، لكن بالليل بيتغير كل ده وبحس فيه بوحدة قاتلة..!

عديت هناك على تمثال طلعت حرب (الكفاءة) وبصراحة ساعة ما شفته لم أستطع سوى إني أرفع له كفي بالتحية في الشارع! ^^"

 

image

ميدان طلعت حرب وفي منتصفه التمثال :)

 

بعدها انطلقت بالمترو تاني إلى محطة الأوبرا، وانتظرت شباب المجلة شوية لحد ما وصلوا، وبدأنا مع بعض الإعداد للحفل مع شوية رغي هادف طبعاً :D وكان هناك من فريق عمل المجلة حبيب قلبي شريف شقارية ورئيس التحرير والصديق العزيز كريم الشيخ، ومحمد شومان وأحمد عرفة وأحمد حامد وأحمد دبور شباب المجلة الأعزاء جداً، وكذلك الأستاذة ناهد سمير والأستاذة منى زين، وسارة درويش-سان المدونة (الأسطورية) ورئيسة قسم حبة ثقافة، وإيمان محمود-سان رئيسة قسم شباب نتيت الجديد..

image

أحمد عرفة

 

image

شريف شقارية :)

 

واستمرت إعداداتنا للحفل لحد الساعة 3 تقريباً وكان الحضور بيتوافدوا شوية بشوية ^^ كانت الفترة الأولى من الحفل مفتوحة لانتظار الحضور واستقبال الضيوف والصحافة وللتعارف على الناس الجداد، وكان الدي جى شغّال طول الوقت على أغاني منير اللي باموت فيها بلا جدال ^^ وكان فيه كمان بوابة تابعة لمركز التكعيبة تبع فكرة (استبدل كتابك) وبوابة لعرض بعض المنتجات والأشغال اليدوية النوبية الأنيقة والمنتجة بحرفية ممتازة فعلاً، وبعض اللوحات والصور المختلفة لأماكن من مصر.

 

صور من الفترة الأولى من الحفل

image

image

image

image

image

 

بعد كده بدأت الفرقة النوبية بإنشاد بعض الأغاني النوبية العريقة والأصيلة مع دقات الطبول ومشاركة من أغلب الحاضرين :) كانت بجد فرقة رائعة وإن كنت مش فاهم ولا كلمة (!) وعلى رأي واحد من الحضور (إني أفهم كلمة! :D)

 

image

image

image

 

بعدها وعلى مدار الحفل كان فيه شوية أسئلة في المعلومات العامة تدرجت من السهولة المطلقة للصعوبة المطلقة :D إنما كانت شوية أسئلة جميلة بجد.. بعدها قدم الشاعران الأستاذ سالم الشهباني والأستاذ أشرف توفيق (مؤلف كتاب مبسوطة يا مصر واللي سعدت برؤيته في الحفل جداً!) فقرة شعرية كفاءة كانت قصائدهم فيها أحلى من بعض بجد.

 

بعدها استمرت الفرقة النوبية في الإنشاد مع مشاركة الجميع طبعاً ^^ وشارك معانا في الأسئلة الأديب الأستاذة فتحي سليمان والأستاذة شاهندة مقلد، وبعدها بدأ بعض المطربين الشباب في تقديم فقراتهم ومنهم (علي الألفي) و(أسامة الورداني) وقدم لنا فقرة أغاني راب Rap لذيذة جداً ^^

وفي نهاية الحفلة طبعاً اتعمل احتفال صغير بعيد ميلاد المجلة شارك فيه كل فريق عمل المجلة حتى العبد لله رغم ضعف الصحة :D واتقطعت التورتة الكبييييييييييرة أوي واللي كان مرسوم عليها شعار مجلة بحلقة الجديد :)

image

وبعدها اضطريت أنا والشباب محمد أبو سنة ورحيم نروّح لأن الوقت اتأخر ساعتها بصراحة ^^" بس هو كان فعلاً يوم من أمتع أيام حياتي، كفاية إنه اكتمل من غير مشاكل تذكر والحمد لله.

كانت أهم مكاسبي في الحفلة دي لقائي بناس كتير جميلة وكان نفسي أقابلها فعلاً منهم الأستاذ أشرف توفيق الشخصية الرائعة والودود، والدكتور مصطفى النجار المدون الرائع واللي سعدت بلقاؤه، وفريق عمل المجلة كله خاصة كريم وعرفة وشومان حبايبي جداً :)، وكذلك الأستاذ فتحي سليمان والأستاذة شاهندة مقلد والأستاذة أمل عبد الواحد، وغيرهم كتير، وكذلك وجود الأصدقاء القدامى الأعزاء شريف شقارية ومحمد أبو سنة وأحمد رحيم وسارة درويش-سان وناهد سمير-سان :)

كذلك كانت من أهم المكاسب استبدالي لبعض الكتب بكتب رائعة من بوابة مركز التكعيبة وهي (فردوس) للأستاذ محمد البساطي و(هنا والآن) لخوليو كورتاثار و(بيت للعابرين) للرائع الأستاذ سعيد الكفراوي..

 

صور متنوعة

image

محمود مختار-ساما ^^

 

image

سنة وشريف ورحيم ^^ رحيم مش عارف مبلم كده ليه :D

 

image

لوحة التوقيع

 

الحمد لله على اليوم الجميل جداً ده، وأشكر كل واحد ساهم في الحفل بحضوره ومساعدته أو حتى باهتمامه بمتابعة الأخبار.. اديتوا لليوم دا ولحياتي طعم مختلف وأجمل ولأجل غير مسمى.. :)

 

(ملحوظة: الصور كلها بعدسة زانجتسو طبعاً واللي فصل شحن في آخر اليوم بعد مجهود أسطوري يُشكر عليه :D)

شكرأً..

 

محمد الوكيل

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s