فترة وعدّت.. (شوية كلام الرابط الوحيد بينه إنه حصل لي!)

بسم الله الرحمن الرحيم

طيب.. بقالي حوالي شهر مش بكتب ولا كلمة تقريباً إلا في مدونة تمبلر ومش بتابع أخبار ومنعزل عن العالم تقريباً، لأسباب كتيرة هي السبب اللي خلاني أكتب هنا النهارده! شوية كلام مفيش بينه رابط غير إنه حاجات حصلت لي في الشهر ونصف اللي فات:

 

 

– اكتشفت فيلم وكتاب رائعين جداً كانوا سبب في تغيير كبير حصل جوايا، ونظرة جديدة مني للدنيا كلها.. الكتاب والفيلم اسمهم (السر The Secret).. معروفين وطالعين من زمان؟ آه مانا عارف! :)) بس أنا ما بدأتش أطّلع عليهم إلا قبل بضعة أيام من امتحانات الدور التاني (آه دخلت دور تاني في كام مادة.. فيه حاجة؟ :))))) ) .. الحقيقة إني فعلاً بحمد ربنا إني وقعت عليهم قبل الوقت الخطير ده، نظرتي للإيمان بربنا سبحانه وتعالى وبالهدف، والإصرار عليه اتغيرت تماماً عن الصورة القديمة الكلاسيكية أوي اللي كان المجتمع والأسرة حفروها في دماغي.. اكتشفت إن مش مجرد التعب والمجهود لوحدهم اللي بيخلوا حد ينجح، ببساطة لأن العربية مهما كانت قوية مش بتشتغل من غير بنزين، وهو في الحالة دي الإيمان.. الإيمان باللي بيتعمل بغضّ النظر عن اللي بيتعمل ده..!

من الكتاب ده اتعلمت يعني إيه إيمان، يعني إيه ثقة بالنفس واحترامها، يعني إيه كلمة إن قوة الإنسان جاية من جواه، يعني إيه إن الخير والحب وشكر الله على النعمة دايماً ليهم مقابل كبير حتى لو ما جاش دلوقت حالاً.. وعرفت إن الزعل على الماضي أو الخوف على المستقبل سذاجة، ببساطة لأن الماضي مات والمستقبل لسه هيتولد، وإحنا بشكل ما اللي بنصنعه.. فنخليه كويس أحسن ما نخليه غير كده..!

ممكن في يوم أدوّن عن الكتاب ده وألخصه للإفادة العامة بإذن الله :) بس نصيحة، اللي شاف التدوينة دي يدور على الكتاب والفيلم بأي طريقة! ^^

 

 

– شهر ونصّ كاملين من المذاكرة في الدور التاني، اللي دخلته بتلات مواد ولله الحمد :)))) ممكن تستغرب لما أقولك إن الشهر ونصف دول كانوا أحلى وقت مذاكرة ليا في حياتي تقريباً بعد الثانوية العامة! أي والله صحيح.. ليه بقى؟ لأني اكتشفت إن مفيش وقت للاكتئاب والعياط والقرف وتقفيل الدنيا من كل ناحية، ملوش داعي في الواقع.. البني آدم عايش عشان يتقدّم ويمشي لقدام وبس، أياً كان الظروف.. ومفيش ظرف بيخلي الواحد يتقدم ويتعلم بجد إلا ظرف زي ده..

في الشهر ونصف دول اتعلمت طرق جديدة للمذاكرة، اتعلمت طرق أفضل لتشجيع نفسي وتثبيت هدفي –اللي هو النجاح يعني- في ذهني بكل طريقة ممكنة وحتى لاشعورياً، عرفت أصحاب جدعان أوي أوي وقفوا جنبي جداً طول الفترة دي، والأهم من ده كله إني طبقت فكرة (كتاب السر).. ما خيبتش معايا أبداً بصراحة، ومنتظر النجاح بسببها –بعد فضل ربنا- قريب بإذن الله :)

 

 

– بإذن الله قريب جداً هتنزل لي تدوينة (كلام مش هيعجب حد!) في كتاب المئة تدوينة (أبجدية إبداع عفوي) اللي هينزل –المفروض يعني- الشهر ده بإذن الله.. وبإذن الله مش هتبقى آخر حاجة منشورة ليا في كتب :)

 

 

– حواسي بدأت تتطور أكتر.. بدأت أشوف الحاجات أحسن وبدأت أقرأ بتركيز وفهم أكتر، حتى القرآن الكريم بدأت أتدبره أكتر بكتير من أي وقت تاني، وحتى الأكل بقيت بآكله بنِفس أوي أكتر من الأول –واللي يعرفوني يعرفوا أنا نِفسي كانت عاملة إزاي أساساً طول عمرها :)) –، وبدأت أسمع أنواع جديدة من الموسيقى وباندات جديدة –ميتال طبعاً إنتم فاكرين إيه؟ :))) – وغيره وغيره.. الحمد لله :)

 

 

– أخيراً وليس آخراً، اشتريت موبايل جديد! أي والله! هتسألوني عن زانجتسو؟ موجود طبعاً وما زلت بحبه جداً، لكن الحياة بتمر والزمن بيتغير.. والعبد لله عارف ده كويس! :))))

إيه بقى الموبايل الجديد يا عم وكيل؟ موبايل HTC Wildfire S ، مزوّد بنظام تشغيل أندرويد.. يعني من الآخر دنيا تانية يعني! :)))

 

أسمع مبروك يا وك وك؟ :))))

خلاص كفاية كده عليكم النهارده :))) أشوفكم في تدوينة تانية بقى :)))

 

 

 

محمد الوكيل

A.M.Revolution

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s