جربت "تتأمل" قبل كده..؟ :)

بسم الله الرحمن الرحيم

 

 

 

قوللي بقى، تعرف إيه عن (التأمل Meditation)..؟

 

لأ، مش قصدي بالتأمل اللي هو إنك تقعد قدام وردة في الحديقة ساعتين تتفرج عليها، ومش قصدي اللي هو تقعد فوق جبال الهيمالايا وتحاول تفهم حقيقة الكون، ومش قصدي اللي هو بيعمله فقراء الهند من إنهم يناموا فوق المسامير بالعشرين سنة أو يطيروا في الهواء بعد شوية تركيز أو كده يعني.. لأ..

 

التأمل (بالمعنى الروحاني) حاجة كنت جربتها في وقت من الأوقات من سنة أو اتنين، وبعدين رجعت اتعلمته ومارسته تاني في فترة امتحانات الدور التاني في سنة تالتة، كانت فترة اتعلمت فيها حاجات كتير غير الدراسة كان من ضمنها التأمل..

 

التأمل ده باختصار شديد ممارسة معينة بتعملها عشان توصل بيها لحالة استرخاء جسدي ونفسي تام، لحالة صفاء روحاني أعلى، وعشان تقدر تفهم نفسك ومشاعرك وأفكارك بصورة أوضح بكتير وتقدر تتعامل معاها في سهولة أكبر.. التأمل ده لو فهمته وعملته صح هيقدر فعلاً يوصّلك لده كله، بس المهم في الموضوع كله إنك متستهينش بيه ولا تعمله من منطلق "أدينا بنجرب" أو "حاجة للتريقة وخلاص".. ثق إن الأمر حقيقي جداً بس المهم إنك تتأكد من كده.. :)

 

 

كنت بعمله إزاي؟ ولا سحر ولا شعوذة:

وقبل ما تبدأ، عاوزك تنوي إنك تتأمل لمجرد التأمل، لمجرد الاسترخاء والتخلص من التوتر، متستعجلش ومتستناش نتيجة ومتضغطش على نفسك إطلاقاً.. إنوي ده بقوة لأن النية هنا مهمة جداً..

 

هتلبس هدوم بسيطة مريحة ليك، هتقعد في مكان هادئ صامت متهوّي كويس قدر الإمكان، وهتقعد على حاجة مريحة سواء سرير أو كرسي أو كنبة أو حتى على الأرض، ما بدا لك يعني ^^

عاوزك بقى تقعد في الحالة اللي تناسبك.. عن نفسي أنا بقعد مربّع إيديّا في حِجْري منزّل رقبتي لتحت سنّة صغيرة.. ممكن إنت تقعد زي ما إنت عاوز حتى لو هتمدد على ظهرك، بس المهم متنامش لأن التأمل غير النوم خالص.. والأهم تبقى قعدة مريحة ليك تماماً وتكون فيها عضلات جسمك كلها مستريحة خالص..

 

 

بعد كده بقى، غمّض عينيك خالص، اعزل نفسك عن أي حاجة حواليك وغمّض عينيك تماماً وبالراحة خالص.. وابدأ!

 

– اتنفس بهدوء خالص.. خد نَفَس عميق جداً بهدوء شديد، تخيّل إنك وإنت بتتنفسه بتسحب معاه طاقة هدوء واسترخاء وطاقة خير صافية.. اتنفسه واحتفظ بيه في صدرك شوية، وبعدين طلّعه.. تخيّل إنك بتطلّع مع النفس ده كل حاجة سلبية ومتعبة من جواك: كل توتر وحزن وخوف وقلق وغضب واكتئاب وملل وضعف ويأس.. كل حاجة سلبية، كل حاجة بمعنى كل حاجة.. ركز أوي في الخطوة دي بالذات، اعملها بضمير أوي وتخيّل إنك بتسحب القذارة كلها من جواك وبتطلّعها مع الزفير..

 

حسّ أوي بالنَفَس وإنت بتشهق وإنت بتزفر.. حس بيه وهو داخل أنفك ومنه على البلعوم وبعدين القصبة الهوائية وبعدين الرئة.. تخيل الهواء النقي بيتسرّب لدمك وبيملاه، ويشيل منه كل القذارة ويطلعها مع الزفير.. وبعدين حس بيه وهو خارج، حسّ بالراحة وإنت بتزفر كأنك خلاص اتخلصت من كل السلبية..

 

ببساطة، ركّز على تنفسك.. فاهم يعني إيه؟ يعني ركّز على تنفسك وبس.. متفكرش في أي شئ تاني في الوجود إلا تنفسك.. بتكلم بجد والله، وقف أفكارك تماماً وركزها كلها على التنفس وبس.. بتفكر إنت كتير أوي طول عمرك، من حقك تقعد شوية من غير ما تفكر.. عشان كده ببساطة شديدة، متفكرش.. ركّز في تنفسك بس واعمله بضمير أوي أوي.. حسّ بيه واستمتع بيه..

 

أسهلها شوية كمان؟ تخيل نفسك عايم في بحر من السواد، مش شايف ولا سامع ولا حاسس بأي حاجة غير نَفَسَك.. ركز في الفكرة دي لوحدها وعلى تنفسك، ومتفكّرش..!

 

 

– وإنت كده، ابدأ ركز مع كل حاجة حواليك وحاسس بيها، لو سامع صوت الهواء ركّز فيه واستمتع بيه أوي، لو حاسس بهدومك لامسة جسمك ومريحاك حسّ بيها أوي.. بس برضه متفكّرش.. ركّز عليهم وبس ومتحاولش تفهم ولا تفكر.. اندمج معاهم وحسّ بنفسك كأنك بقيت واحد مع كل اللي حواليك.. إنت أساساً جزء من الكون ده ومكونات جسمك كلها مش مختلفة كتير عن اللي حواليك.. خلاص، اندمج مع الكون ده من جديد وخليك جزء منه..

 

 

– وإنت كده، من غير ما تتحرك من مكانك ولا تتوتر، دور على أي منطقة متوترة في جسمك وارخيها خالص.. آه هتعرف تعمل كده، ركز شوية بس واعرف فين التوترات.. في رقبتك، في رجلك، في بطنك أو في وشّك، هتلاقيها.. ساعتها ارخيها تماماً وريّحها، وارخي جسمك كله ومتتوترش لأي سبب.. كل اللي بيعمل الشغل هنا دماغك وروحك..

 

 

– استمرّ كده شوية.. بعد شوية هتبدأ مشاعرك الدفينة جواك تظهر على السطح.. هتحسها بتظهر وسط السواد اللي إنت متخيل نفسك فيه، لما تشوفها برضه متتوترش أبداً ولا تقلق.. ببساطة شديدة، لو مشاعر سيئة أو سلبية، اتحرر منها.. خليها تنطلق، خليها تخرج مع النفس العميق، بهدوء وبرفق، ريّح نفسك منها تماماً وحررها..

لو مشاعر حلوة، راحة أو سعادة أو محبة أو أمل، ركز فيها، خليها تمشي في مجرى دمك واستمتع بيها، انبسط بيها وضخّم شعورك بيها أوي أوي أوي.. هتلاقي نفسك شوية بشوية حسيّت بقوة كبيرة.. هتحسّ إنك بدأت تفهم كل شئ في نفسك.. هتحسّ أخيراً إن مشاعرك اتنظمت وبقى ليها شكل مفهوم..

 

المشاعر السلبية حاجة بتضايقك وبتتعبك.. وماله؟ اعرفها فين بالضبط وخرّجها من جسمك مع النَفَس، كل شعور سلبي حتى لو كان مجرد زهق بسيط.. المشاعر الجميلة حاجة بتريحك وبتحسسك بالسعادة، إنت أصلاً عايش عشان تحسّ بالسعادة، من حقك إنك تسعد وإنك تستمتع بمشاعرك الجميلة..

 

مجرد ما تعرف ده كله، مجرّد ما تحس إنك سيد نفسك، سيد مشاعرك، سيد أفكارك، هتحسّ بالقوة دي.. هتحس نفسك كائن خارق ملوش حدّ..! قدرت أخيراً تفكّ عُقَد نفسك وتنظّم الكركبة اللي جوه دي كلها.. أخيراً.. أخيراً بقيت أقوى من زمان بكتير..

 

 

– ممكن وإنت كده، تلاقي شوية أفكار مشوشة ظهرت وسط السواد.. كلامك مع أصحابك أو حادثة ع الطريق وإنت جاي أو فكرة هابلة كده، لما تلقط حاجة زي دي، متحاولش تزقها، ومتتوترش.. امحيها بالراحة خالص وامسحها كده وخليها تخرج، انوي إنك تخرجها عشان تستمتع بالحالة دي أطول وأطول.. شوية بشوية مش هتلاقي أي حاجة بتشتتك، هتلاقي نفسك مندمج تماماً..

 

 

– ممكن وإنت كده تحسّ إن أجزاء في جسمك بتنبض أو بترتعش أو بتنمل تنميل خفيف جداً.. ممتاز..! معنى كده إن التوتر والسلبية كلها بدأت تخرج وإن جسمك بيتخلص منها.. دي طريقة جسمك عشان يقولك إنه خلاص بدأ يرمي الحمول التقيلة..

ممكن وإنت كده تلاقي نفسك دخلت في حالة غريبة.. حالة زي غفوة بسيطة، مش نوم، مجرد غفلة سريعة كده بس هتبقى مريحة أوي.. دي طبيعية وبتحصل كتير وعادية جداً ^^

 

 

– ممكن وإنت كده، في سرك وفي هدوء شديد تطلب من ربنا سبحانه وتعالى يهدي قلبك ويمنحك السكينة والراحة.. والله هتحصل بس لو طلبتها بصدق.. :) هتحسها طاقة كبيرة أوي بتنور السواد ده وهتخليك أقوى بكتير جداً.. جداً.. جربها لما تحتاج :)

 

 

– الأهم في ده كله: إنك تعمله بهدوء جداً جداً.. إنت قدامك الوقت كله اللي في الدنيا، متستعجلش أبداً وسيب كل حاجة تحصل لوحدها ومتفكرش في نتيجة ولا تستعجل عليها لأنها هتحصل لوحدها.. استمرّ بس واستمتع بالحالة واسترخي تماماً تماماً..

ومش لازم تطوّل، ربع ساعة أو تلت ساعة في اليوم كله كفاية جداً.. ^^ وقت ما يحلا لك تخلّص قوم، بس برضه بالراحة ومن غير استعجال.. انوي جواك إنك خلاص اكتفيت وإنك انبسطت من الحالة دي وإنك عاوز تقوم عشان تجرّب قوتك ومشاعرك الجديدة عملياً.. وبالراحة خالص كده ابدأ صحّي نفسك وابدأ حسّ بالدنيا من جديد، افتح عينيك على مهلك جداً وحرّك صوابعك بالراحة خالص وفكّ جسمك على مهلك.. عارف إنت لما تبقى كأنك لسه مخلوق حالاً ولسّه بتحسّ بجسمك الجديد؟ هو كده! ^^

 

 

 

حاجة كمان، تقدر بدل التركيز على تنفسك تركّز على موسيقى هادية جداً.. مش أغاني، موسيقى! موسيقى هادية ويفضّل تكون وترية زي الموسيقى اليابانية التقليدية، وده مثال لمقطوعة أنا بتأمل عليها دايماً وبتريحني وتنفعني جداً:

http://www.mediafire.com/?jztmukutmgi

 

 

هنا برضه هتركز على الموسيقى وبس، حسّ بيها بتمسح كل حاجة سلبية من جواك وبتطردها برة، وحس بمتعتها وبكلّ شعور جميل بتبعثه جواك، وبس.. :)

 

 

 

يالا، ابقى جرّب وقولي عملت إيه، تبادل خبرات بقى وبتاع! ^^

 

 

شكراً..

محمد الوكيل

A.M.Revolution

 

 

"وكيلـ"ـليكس #6 (من الثلاثاء 11 أكتوبر إلى الخميس 20 أكتوبر)

 

 

شوية وكيليات جديدة.. نهاركم أبيض إن شاء الله ^^

 

 

 

الثلاثاء 11 أكتوبر (عن البني آدمين.. وكذبة صغيرة في النص..!)

 

 

 

– معلومة وكيلية 99: بتبقى سخيفة جداً لما تكون بتكتب ومنفعل ومستغرق في الكتابة وواحد عبقري ياخد منك الورق يقراه رخامة كده =.= #WakeelFacts

– معلومة وكيلية 100: فخور بإني أنا، بحلوي ووحشي وشكلي وقلبي، بكل حاجة فيا.. وسعيد إن ربنا رآني مستحق لنعمة الحياة.. :) #WakeelFacts

– معلومة وكيلية 101: الشخص الحزين أو المكتئب بتقدر تحس بيه من بعيد وبمنتهى السهولة أحياناً.. متفهمش إزاي..! #WakeelFacts

 

 

 

الأربعاء 12 أكتوبر (ملهمش دعوة ببعض ^^)

 

 

 

– معلومة وكيلية 102: الصور اللطيفة اللي البنات بتحطها على الفيس بوك دي، بتبقى هتموت وتعرف بيجيبوها منين، فعلاً! :D #WakeelFacts

– معلومة وكيلية 103: مش عيب خالص يعني لما تقول إن دينك أو طائفتك كذا، العيب إنك تتقنزح على خلق الله وتذل أهاليهم بكده :) #WakeelFacts

 

 

 

الخميس 13 أكتوبر (عن المزاج..!)

 

 

 

– معلومة وكيلية 104: الوكيل في حالة مزاجية غريبة اليومين دول وقرفان حبتين ونفسه يخرج من الحالة دي =.= #WakeelFacts

– معلومة وكيلية 105: القعدة مع كتاب لطيف وشوية موسيقى لا بأس بهم، بالدنيا كلها! ^^ #WakeelFacts

– معلومة وكيلية 106: العِند والسير ضد التيار له متعة خاصة جداً.. بس مش بالضرورة صح في كل الحالات، ومش بالضرورة غلط برضه! ^^ #WakeelFacts

 

 

 

الجمعة 14 أكتوبر (عن الشيخ "عقدة" الطبيب الفيلسوف والقلش الدَعَوي =.= )

 

 

 

معلومة وكيلية 107: اكتشفت إن الشيخ عُقدة بيفهم في الطب كمان، مش معترف بحاجة اسمها الموت الدماغي! ^^ #WakeelFacts

معلومة وكيلية 108: الشيخ عقدة بعد ما سألته اكتشفت إنه مش مؤمن بأي اكتشاف علمي إلا لما يشوفه بنفسه! ^^" #WakeelFacts

معلومة وكيلية 109: الشيخ عقدة مؤمن بالله وعنده أدلة -وأنا مش معترض-، ومش مؤمن بأي اكتشاف علمي لمجرد إنه مش شايف ده بعينه! ^^ #WakeelFacts

معلومة وكيلية 110: فيه ناس على الفيسبوك عندها مزاج غريب تعمل حاجة اسمها "القلش الدَعَوي" =.= #WakeelFacts

معلومة وكيلية 111: "القلش الدعوي" إن واحد يقول جملة ما وبعدين فجأة تلاقيه قلبها وعظ! اعتراضي ع الأسلوب مش ع الدعوة بالمناسبة ^^ #WakeelFacts

معلومة وكيلية 112: سوف لن أنحني، سوف لن أتحطّم! سوف أطيح بالعالم كله! سوف لن أسقط، سوف لن أختفي.. لسوف أخطف أنفاسكم..!! #WakeelFacts

 

 

 

السبت 15 أكتوبر (عن الطب والثقافة و"من زُحْزِحَ عن النار وأُدْخِلَ الجنة"..)

 

 

 

– معلومة وكيلية 113: "فمن زُحزِحَ عن النار وأُدخِل الجنّة فقد فاز".. وسبحانه وتعالى ربنا هو اللي هيُدخله، مش أنا ولا إنت..!! #WakeelFacts

– معلومة وكيلية 114: قراءة كتاب معقّد مش بتفهمه مش هتخليّك مثقف.. فهمك كويس للي تقدر تقراه هي اللي بتخليك كده! ^^ #WakeelFacts

– معلومة وكيلية 115: أغلب الناس ميعرفوش -أو بيطنشوا بمزاجهم- إن يوسف إدريس كان دكتور! :D #WakeelFacts #Literature

– معلومة وكيلية 116: الطب مش بيأكّل عيش كما هو واضح، والدليل على كده كل الأدباء اللي سابوا الطب عشان يكتبوا! :P #WakeelFacts

– معلومة وكيلية 117: فيه ناس محرّمة على نفسها تقول الحق في أي حاجة لحسن يبطلوا يبانوا إنهم أبطال وشجعان ولو قدام نفسهم! ^^ #WakeelFacts

 

 

 

الأحد 16 أكتوبر (عن المزايدات والمايكات ^^)

 

 

 

– معلومة وكيلية 118: الوكيل بيقول بصراحة: هو بيكره مزايدات النشطاء والمثقفين، بجميع أنواعهم وبجميع أنواعها!! #WakeelFacts

– معلومة وكيلية 119: ممتع أوي لما تتكلم في المايك وتسمع صوتك ضخم أوي كده.. :)))) #WakeelFacts

الثلاثاء 18 أكتوبر (عن الإسرائيلي الأسير، وع البساطة البساطة! ^^)

 

 

 

– معلومة وكيلية 120: مش مصدق إن فيه حد ممكن يسمي ابنه "جلعاد" أو "شاليط" =.= #WakeelFacts #GiladShaleet

– معلومة وكيلية 121: البساطة والتلقائية ليهم متعة وسعادة خاصة جداً.. مبقاش كاذب لو قلت إنهم سر السعادة نفسها! ^^ #WakeelFacts

– معلومة وكيلية 122: أحياناً بتحتاج إنك متعملش حاجة في الدنيا غير إنك تبطّل تفكير.. وتقدر تعملها فعلاً بس لو أردت ذلك ^^ #WakeelFacts

 

 

 

الأربعاء 19 أكتوبر (عن لوركا والأصنام.. حد فاهم حاجة؟ ^^")

 

 

 

– معلومة وكيلية 123: الأصنام عند كفار قريش كانت ثوابت مقدسة، بس كانت غلط جداً حتى وهي ثوابت وحتى وهي محاوطة الكعبة.. حد فاهم؟ ^^ #WakeelFacts

– معلومة وكيلية 124: المشكلة في شعر لوركا إنه أحياناً بيحتاج واحد عبقري عشان يقدر يفهم رمزياته ^^" #WakeelFacts

 

 

 

الخميس 20 أكتوبر (عن الفطرة والمشاعر وعن واحد كلب مات النهارده..!)

 

 

 

– معلومة وكيلية 125: فرق بين بين "فطرة الله" و"الهوى".. الأولى هي الخير والحق بعينه، التانية من الشيطان.. :) #WakeelFacts

– معلومة وكيلية 126: القذافي الكلب اتقتل أخيراً، ولكل ظالم عبرة في جيفة الكلب ده.. "المعلومة دي للذكرى الخالدة..!" #WakeelFacts #Gaddafi

– معلومة وكيلية 127: بكره العيانين الكذابين.. لأنهم هيخلوني كطالب طب غلبان آخد منهم الحالة غلط وممكن أنقص درجات =.= #WakeelFacts

– معلومة وكيلية 128: بطريقة أو بأخرى تقدر تحسّ بالمشاعر السلبية اللي في جوّ مكان ما، بس مش بتاخد بالك..! ^^ #WakeelFacts

 

 

 

بس كده ^^ جمعتكم حلوة إن شاء الله ^^

 

 

محمد الوكيل

A.M.Revolution

"وكيلـ"ـليكس #5 (من الخميس 6 أكتوبر إلى الاثنين 10 أكتوبر)

 

يااااه، وصلت لخمسة بسرعة كده؟ سبحان الله! :)))

طيب خلاص، شوية "وكيليات" كمان من تويتري الخاص.. اتفضلوا ^^

 

 

الخميس 6 أكتوبر (عن صاحب أشهر تفاحة في العالم، والسياسة والمزيد من "بتبقى رخمة أوي لما.." :))) )

 

 

 

 

– معلومة وكيلية 68: ستيف جوبز كان عبقري، حقيقي.. ربنا يتولاه برحمته.. :) #WakeelFacts #RIPSteveJobs

– معلومة وكيلية 69: برضه أندرويد متوقع منه إنه يتفوق على آبل قريب جداً.. ربما أقرب مما نتخيل يعني! ^^ #WakeelFacts #Android #iOS

– معلومة وكيلية 70: بتبقى رخمة أوي لما تبقى قاعد على جهازك ومزاجك عالي وحد يناديك يقولك رد على التليفون ولا شوف الباب =.= #WakeelFacts

– معلومة وكيلية 71: بتبقى رخمة أوي لما يبقى مزاجك مش ولابد وتبص تلاقي العالم بيتظافر عشان ينيله أكتر =.= #WakeelFacts

– معلومة وكيلية 72: النهارده يوم نصر حقيقي، نصر بجد مش كده وكده :) ربنا يكمل انتصاراتنا دايماً ويحفظنا من لصوص الأمجاد..! #WakeelFacts #Oct6

– معلومة وكيلية 73: كونك بتقبل بتعميم صفة معينة على الناس معناه إنك بتقبل بإن أي حد يعمم أي صفة عليك من غير ما يعرفك..! #WakeelFacts

– معلومة وكيلية 74: كونك مش قادر تحب حد لمجرد إنه مختلف عنك في الفكر أو الدين دافع قوي لأنك تعيد النظر في نفسك وعقلك..! #WakeelFacts

– معلومة وكيلية 75: مبارك كان بيقول على السائل اللي بيستخرج من باطن الأرض "البوطرول" :D :D #WakeelFacts

– معلومة وكيلية 76: نظام مبارك كان محسسنا إن مبارك ده عامل زي "س-18" كان بيدمّر مقاتلات الأعداء وبيهزم الجيش كله لوحده =.= #WakeelFacts

– معلومة وكيلية 77: محتاجين كمسلمين نفكر أكتر في كل حاجة، حتى في الدين نفسه.. ببساطة لأننا مأمورين بكده بس مش واخدين بالنا! ^^ #WakeelFacts

– معلومة وكيلية 78: مفيش طالب طب مقتنع إنه دكتور فعلاً، عشان كده بتلاقيهم بيقولوا لبعض يا دكتور كل شوية. بيقنعوا نفسهم لا أكثر!:) #WakeelFacts

 

 

 

الجمعة 7 أكتوبر (عن "الشيخ عقدة" تاني واجتماعيات وأسريات وأشياء أخرى =.= )

 

 

– معلومة وكيلية 79: "الشيخ عقدة" بيتكلم في السياسة أكتر ما بيتكلم في الدين وهو على المنبر، وهو مش بيفهم ف الاتنين أصلاً! ^^ #WakeelFacts

– معلومة وكيلية 80: الشيخ عقدة بينكر إن الأرض كروية (!) رغم إن الشيخ بن باز نفسه ما قالش بكده وكذب اللي أطلق الإشاعة دي! :))) #WakeelFacts

– معلومة وكيلية 81: الشيخ عقدة لسبب ما مصرّ إنه "لا علّة بل هو الله الواحد القهار" مع إن أرسطو لما قال كده كان يقصد ربنا برضه ^^" #WakeelFacts

– معلومة وكيلية 83: الأخوات الصغيرات ممكن يبقوا أرخم مخلوقات في الدنيا، بمعنى الكلمة =.= #WakeelFacts

– معلومة وكيلية 84: تصريحات الشخصيات المهمة والنخبة كلها شبه بعضها، فعلاً، مع تغيير الألفاظ بس لا أكثر ^^" #WakeelFacts

– معلومة وكيلية 82: لأن الوكيل إنسان، ممكن ينسى ويلخبط بسهولة جداً، عشان كده هو نسي يكتب المعلومة 82 بعد 81.. خير :)))) #WakeelFacts

معلومة وكيلية 85: المسلمين زمان كانوا بيتزوجوا بما معهم من القرآن.. طب أنا حافظ أكتر من جزءين، مينفعوش دول يعني؟ =.= #WakeelFacts

معلومة وكيلية 86: بعض الناس في الأفراح بيكتبوا الحرف الأول من اسم العروسة في دعوة الفرح، على أساس إنها عيبة..!! #WakeelFacts #EgyMarriage

 

 

 

السبت 8 أكتوبر (عن الأبطال الخارقين.. وبس! :)))) )

 

 

معلومة وكيلية 87: في أي كارتون لسوبرمان تلاقي هوايته تدمير المباني اللي حواليه ف القتال، والغريبة إن مفيش ناس بتموت ف كل ده! ^^ #WakeelFacts

معلومة وكيلية 88: رغم إن سوبرمان المفترض بيه إنه متكامل تماماً وقوي وذكي وكل حاجة، تحسه دايماً غبي وباتمان هو اللي بيسنده :D #WakeelFacts

معلومة وكيلية 89: سوبرمان وهو من هو، خِرِع بياخد لوكمية يتنطر 100 متر قدام وحلني على ما يقوم بقى ويعرف ينتصر :D #WakeelFacts

معلومة وكيلية 90: لسبب ما، كل بطل خارق غبي بشكل أو بآخر، عنده حتة غباء غريبة هي دايماً اللي بتوقعه :D :D #WakeelFacts #DCComics

 

 

 

الأحد 9 أكتوبر (مصريات..؟ ^^)

 

 

معلومة وكيلية 91: تصليح الخطأ بخطأ آخر مش فلاحة، ده نوع من الغباء المستحكم بيمارسه أهل تويتر كعادة محببة ^^ #WakeelFacts #TwitterPeople

معلومة وكيلية 92: لو كانت عندي القدرة على التحكم في الزمن كنت رجعت لحد يوم 6/10/1981 وخليت الرصاصة تيجي في نائب السادات..! #WakeelFacts

معلومة وكيلية 93: أنا في طريقي إلى أيام أفضل، لسوف أجدُ إيماني، ولسوفَ أجدُ طريقاً.. :) #WakeelFacts #BreakingBenjamin

معلومة وكيلية 94: خالد منتصر لما مش بيلاقي حاجة يكتبها في المقال يشتم له في كام حاجة في الدين على كام إسلامي.. لأنه فاضي! ^^ #WakeelFacts

معلومة وكيلية 95: الإعلام في مصر من القذارة لدرجة إنه بيبرْوِز هفوات بعض التيارات وبيخفي تماماً بلاوي بعض التيارات الأخرى..! #WakeelFacts

 

 

 

الاثنين 10 أكتوبر (حياة..!)

 

 

معلومة وكيلية 96: الوكيل برضه مش ناوي يبطل أمل ومش ناوي يقف على الأطلال زي ما ناس كتير بتعمل.. #wakeelfacts

معلومة وكيلية 97: كل واحد بدل ما يفكر فيما هو آت بيستعرض مهاراته في الوقوف على الأطلال بدل ما يمضي قُدُما.. #wakeelfacts

معلومة وكيلية 98: متسمحش لمخلوق يحسسك بالذنب عشان إنت عايش.. عيش طول مانت عايش واوعا تندم على نعمة الحياة..! #wakeelfacts

 

 

 

بس كده.. :) هدية بسيطة كده بس في آخر البوست المرة دي ^^

Breaking Benjamin – Ladybug

http://t.co/RO5K6Zjf

 

 

 

 

 

محمد الوكيل

A.M.Revolution

"وكيلـ"ـليكس #4 (من السبت 1 أكتوبر إلى الأربعاء 5 أكتوبر)

 

 

السبت 1 أكتوبر (منوعات! ^^)

 

 

– معلومة وكيلية 51: الأندرويد في خلال سنة بالكتير هيكون حاجة أسطورية تغير مجرى التاريخ، بس المهم الشغل بضمير :))) #WakeelFacts #Android

– معلومة وكيلية 52: التنمية البشرية علم لطيف بس يُعتبر قشور لموضوع أكبر وأعمق بكتير جداً.. #WakeelFacts #SelfHelp

– معلومة وكيلية 53: بعض "أدبيات الزواج" المنتشرة ع صفحات الفيس بتبقى ساذجة وسخيفة جداً لدرجة إنها تكرهك ف الجواز فعلاً! :D #WakeelFacts

– معلومة وكيلية 54: الي بيكتب أدبيات عن الزواج كتير خياله خِصب أوي فعلاً وأشك إنه يشوف السعادة دي كلها ف الجواز إلا ف الجنة :))
#WakeelFacts

– معلومة وكيلية 55: التخوين طريقة السذج أو الضعفاء أو الحنجوريين.. بس، ومفيش استثناء :) #WakeelFacts

 

 

الأحد 2 أكتوبر (عن الجامعات والأفلام الداعرة! ^^" )

 

 

 

– معلومة وكيلية 56: المفروض الجامعات تفكر جدياً في اعتبار اليوم الأول من الدراسة "عرض أزياء" ف البراح :))) #WakeelFacts #ItsMedicalStudentLIfe

– معلومة وكيلية 57: بأكره الحيرة السخيفة في أول يوم دراسة في الجامعة، وموجودة دايماً حتى لو دي رابع سنة لك ف الكلية :D #WakeelFacts

– معلومة وكيلية 58: فيلم "احكي يا شهرزاد" (الأسطوري) فيلم داعر، مهما أي حد حاول يصوره لي إنه "إبداع".. قضية حقيقية وعرض دنئ! #WakeelFacts

– معلومة وكيلية 59: ناس كتير بتعتبرني أهبل وبتزعل مني عشان بتفائل كتير.. معلش، خليكم متشائمين وضيعوا صحتكم في كده أنا مالي؟ :) #WakeelFacts

 

 

 

الاثنين 3 أكتوبر (عنّي وعنّك..! ^^)

 

– معلومة وكيلية 60: الوكيل زي العسل.. ودا مش كلامي والله دا كلام واحد صاحبي اسمه زيدان :-P #WakeelFacts

– معلومة وكيلية 61: بلاش تركز على غلطات الناس لأنهم مش ملايكة -وإنت كمان!- وبلاش تتلكك لحد، فكلك عيوب وللناس ألسن :) #WakeelFacts

– معلومة وكيلية 62: مش معنى إنك مش حاسس إن الحياة عادلة معاك إنها مش عادلة.. بس ربنا له طريقته في العدالة، فمتقلقش ^^ #WakeelFacts

 

 

الثلاثاء 4 أكتوبر (بتبقى رخمة أوي لما..!)

 

– معلومة وكيلية 63: جلال عامر جامد بغباء! ^^ #WakeelFacts

– معلومة وكيلية 64: بتبقى رخمة أوي لما تيجي تدخل بروفايل واحد صاحبك ع الفيس تسلم عليه تلاقيه شالك من الفريندز =.= #WakeelFacts

– معلومة وكيلية 65: بتبقى رخمة أوي لما تبص لنفسك تلاقيك بعد ما كنت مزأطط طول اليوم بقيت حزين فجأة =.= #WakeelFacts

– معلومة وكيلية 66: بتبقى أرخم بكتير لما تكتب لحد على الوول بتاعه أو تعمل له منشن في تويتر وميعبركش.. بتبقى عاوز تضربه بالجزمة! #WakeelFacts

 

 

الأربعاء 5 أكتوبر (#ItsMedicalStudentlife !)

 

– معلومة وكيلية 67: الوكيل هو أول من أخترع الهاشتاج المسمى (إنها حياة طالب الطب) من سنة وشهر بالضبط! ^^ #WakeelFacts #ItsMedicalStudentLife

 

 

كفاية كده النهارده، إيه؟ هنطمع؟ :))))

 

شكراً…

 

 

محمد الوكيل

A.M.Revolution