عصارة القلب (2) (عن ميكروفون والشيخ عقدة وأشخاص أعزاء وأشياء أخرى)

بسم الله الرحمن الرحيم

– الفترة دي، رغم إني ولله الحمد الجانبين المختلفين جوايا اتصالحوا، اللي هما الجانب المتحرر نوعاً والملتزم جداً، إلا إني ما زلت عندي شوية شكوك رخمة كده..

باختصار شديد يعني ومن غير ما حد من أصحابي يزعل وفي كلمتين: هو إسلام مين فيكم اللي صح؟ ^^” وهو ليه البعض بيعتبروا إن الكلام اللي هو وجهة نظرهم هو ده وجهة نظر ربنا برضه؟ وليه بيتفرض علينا؟ هو عيشتنا إيه الفسوق اللي فيها عشان البعض دول -ومنهم الشيخ عقدة!- يعتبر إنها فاسدة وبنت ستين في سبعين ومحتاجة تتصلح..؟ وليه أضطر أوصل لدرجة إني في فترة من الفترات أزهق فعلاً من الدين ومن أصحابه بسبب الخناقات دي؟

عشان خاطري، كل واحد له وجهة نظر في الدين -وأكرر كل واحد!- يروح يتأكد من سلامة دينه هو نفسه الأول، ومن سلامة وجهة نظره اللي تحتمل الصح والغلط برضه مهما حاول يثبت العكس، وبعد كده لو اتأكد يعني خليه يحلف براحته إن دي وجهة نظر ربنا سبحانه وتعالى..!

الخاطر ده جه في بالي النهارده لما شفت الشيخ “عقدة” زي كل جمعة بيقلب موضوع الخطبة كلام البارانويا إياه بتاع “جماعة الشيطانيين” و”سوف نهزمهم” ده ونازل تكفير صريح أحياناً وتلميح أحياناً في ناس كتير منهم أموات.. مش فاهم فعلاً بتاع إيه وبأي حق بيتكلم بالكِبْر ده..؟ وآه هو كبر واضح وظنّ بإن هو لوحده اللي صح.. عشان إيه، بجد..؟؟ ولحد إمتى بقى لأني فعلاً زهقت ونفسي أعرف أمشي بأنهي إسلام بالضبط؟!

– الأسبوع ده وأخيراً صدر العدد الثاني من مجلتنا الطلابية (ميكروفون).. وبصراحة، أنا المرة دي فعلاً عرفت “الولادات المتعسرة” بتبقى عاملة إزاي! مشقة رهيبة وعمل جماعي وخناقات وعصبية كتير، ومحاولات تنظيمية تفشل ساعات وتنجح ساعات، وتوتر وقلق ووضع للأيدي على القلوب.. حقيقي، قلوبنا كانت بين إصبعين من أصابع الرحمن الفترة اللي فاتت.. ولله الحمد تعبنا ما راحش على الأرض..

عرفت ده لما لقيت إن أول 150 نسخة من العدد خلصوا في ساعتين زمن بالدقيقة!! عرفته لما شفنا الطبعة ولقيناها تحفة، تُقارن بالمجلات المعروفة بجد مش بهزار، لما لقينا الناس بتيجي وتشتريها من غير سؤال وتاخد بالنسخة والاتنين والتلاتة وتحجز نسخ.. عرفته لما شفت شريف دويب فرحان بإن رباعياته نزلت في صفحة كاملة، ولما محمد أبو سنة انبسط بإن مقاله معلن عنه على الغلاف، ولما صديقي العزيز محمد فتحي ابتسم وكان مرضي لما شاف خاطرته وتصميم الصفحة، ولما شفت نظرة الإنشكاح اللي مش هنساها أبداً في عيون صديقي الماليزي أحمد الغزالي لما لقى صورته واسمه نازلين على مقاله اللي ترجمته بإيدي وكنت سعيد بده..

عرفته لما شفتنا كلنا فرحانين فرحة مجنون بالعدد كأنه ابننا بلا أدنى مبالغة، لما الشريف اتصل من الأقصر عشان يطمن على التوزيع، ولما يمنى ورضوى وهدير ونورا ما استنوش وراحوا مطلعين النسخ من الأكياس يقروها وهما في منتهى السعادة، لما لقيتنا بنجهّز للاحتفال بالعدد من كل قلبنا وإحنا حاسين إننا تعبنا.. ولما شفت صورة عم خيري منورة مقالي المتواضع عنه، وشفت رسوم عم حجازي ربنا يرحمه مزينة صفحتي عنه.. الحقيقة مصدقتش.. الحقيقة كنت فرحان أوي أوي.. حسيت إن إحنا على قمة العالم بلا أدنى مبالغة.. :)

شباب ميكروفون: إنتو أحلى شباب في العالم! ^^ وإحنا الأفضل بلا منازع وهنكتسح!! جاد بليس يو إيفري وان! :))

– العيال أصحابي اللي كانوا في رحلة الأقصر وأسوان: ما كنتش زعلان لأني ما رحتش معاكم الرحلة، عادي والله أنا مش واحد رحالة أوي كد ولا عاشق للسفر بعيد عن طنطا كتير.. لكن كنت زعلان أوي لأن الكلية كانت وحشة من غيركم كلكم الأسبوع اللي فات ده.. وحشتوني يا ضفادع بجد، الدنيا مضلمة من غيركم، يخرب بيت كده يعني :(

– فيه شخصية معينة بقيت بشوفها كتير في الكلية الأيام دي، بحترمها جداً جداااااااً ويعلم الله إني بنبسط جداً لما بشوفها، دماغ عالية وكتابات جميلة جداً، أردت فقط إني أقول إني شاكر ليها جداً على حاجات كتير، وشاكر لله أكتر :)

Work hard, love life, don’t be too hard on your mind, and Never Surrender ^^

– بدأت أحبّ الشغل فعلاً وأحب آخد المسؤولية وأشيلها ومزهقش منها.. أنا اتغيرت، حقيقي.. سعيد إني بقول كده أوي أوي، وأعتقد إن الوكيل اللي نفسي فيه بيقترب من أن يولد بإذن الله :)

– بحب ربنا أوي.. وعاوز أوصل له وأحس بمعيّته بكل طريقة ممكنة.. ونفسي يسامحني لو كنت غلطت في حقه.. بس كل ابن آدم خطاء وهو أعلم بكده.. سبحانه وتعالى.. ونفسي أشوفه ^^

– إن شاء الله، هلاقي الطريق.. إن شاء الله، حياتي هتبقى أحسن من كده.. إن شاء الله، ربنا هيصلح حالي وهيقرب مني البعيد.. :) إن شاء الله ^^

بس :)

محمد الوكيل

A.M.Revolution

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s