خرافات شائعة (1) (عن الفن والطب والدين والرجالة والبنات والوكيل وأشياء أخرى)

(سلام طاير داير لعمنا الكبير أوي محمد سويلم، المُلهم الأعظم :))) )

– مسرحية (كده أوكيه) دمها خفيف وتضحّك.

– هند صبري في مسلسل (عايزة أتجوز) –اللي كانت بتعوي طول المسلسل في كل مناسبة ممكنة- فظيعة وملهاش حل وتضحّك وخفّة.

– الأنمي والكارتون للأطفال وبس.

– موسيقى الميتال هي لعبادة الشيطان، على أساس إني ناصب الصنم في البيت وقاعد بطوف حواليه سبع مرات قبل ما أروح الكلية الصبح.

– أمّ كلثوم إلهة الغناء العربي ومتولدش ولا هيتولد زيها واللي ميحبهاش متخلف عقلياً.

– عبد الحليم فظيع وملوش حل واللي ما بيحبوش حمار ومتخلف عقلياً برضه وربما يستحقّ الإبادة العرقية هو واللي يتشددوا له كمان.

– (أنا مش كافر بس الجوع كافر) بتاعت زياد الرحباني حلوة وكل اللي بيسمعها مثقّف.

– الأغنية السابقة بتتقال لكلّ إسلامي كلامه ما بيعجبكش (على أساس إنهم ماسكين كفّارة بالكهرباء).

– طالب الطبّ مجرد ما يدخل الكلية بيبقى بيعرف يدّي حقن ويقيس ضغط ويكتب أدوية ويعمل جراحات ويخيّط ومفيش مانع يكون بيعرف يزرع كبد كمان بالمرة.. ميعرفوش إنه لحد سنة رابعة مبيعرفش يعمل إكزامينيشن لعضلات العين حتى =.=

– الشباب في كلية الطبّ ذئاب لابسة جلد بني آدمين ومنتظرين الفرصة المناسبة.

– أي شاب في طب بيكلّم بنت –حتى لو بيديها قلم وقع منها- يبقى بيحبها ومش قادر يعيش من غير التراب اللي بتمشي عليه، وأي اتنين بيتكلموا مع بعض ولو كانوا بيتكلموا قدام مكتب العميد شخصياً مرتبطين وهيتخطبوا قريب “مع ملاحظة إن الناس بتتعامل على هذا الأساس :)) ”

– بلاش تتجوّز دكتورة :))

– المريض في المستشفى الجامعي بيُعامل كإنسان مش كبهيمة.

– الرجالة كلهم كبيرهم وصغيرهم كلاب تندبّ في عينيهم رصاصة.

– البنات ما بيفكروش في حاجة في حياتهم غير المذاكرة والكلية ومن بعدهم الجواز.

– كل واحد بيمسك مايك في جامع ودقنه طويلة وبيتكلم عن “الغرب وأعداء الإسلام” شيخ وفقيه.

– الغرب موراهوش أي حاجة في الحياة غيرنا.

– الدين أفيون الشعوب.

– كل رجل دين ابن كلب –مسلم مسيحي بوذي مش فارقة- وكلّ واحد بدقن حقير وواطي ووصولي وبياكل بالدين (آه وبيلحس البيّادة برضه :)) )

– كل المثقفين كلاب سلطة وبيكرهوا الإسلاميين وعايشين في أبراج عاجية.. آه و علمانيين/اشتراكيين/فوضويين/أناركيين، وملحدين وبيشتموا ربنا (عشان تكمل الوصفة بس :)) )

– كل واحد إخواني (ضع شتيمة قبيحة بين الأقواس) وكل واحد منشقّ عن الإخوان دماغه حلوة وعبقري.

– عمرو موسى راجل محترم وسياسي محنّك.

– المجلس العسكري حمى الثورة (قديمة =.=)

– الثورة ثورة الشباب.. على أساس إن اللي  بيترشحوا للرئاسة كانوا بيلعبوا في دوري المومياوات تحت 7000 سنة.

– مصر مش ميدان التحرير.. أكيد، فيها ميدان الحريّة وميدان مصطفى محمود وميدان الساعة وميدان اسكندرية إلخ إلخ إلخ..

– مينفعش تكون ناجح في مصر.

– كلمة (بنّوتة) كلمة لطيفة وظريفة.

– الشاب اللي بيقعد على قهوة صايع ومنحرف وموراهوش شغلانة في حياته ومتسكّع.. (الشيخ عقدة اللي بيقول مش أنا :P )

– اسكندرية محروسة من الإنس ومن الجان وفيها 300 ألف سفينة ع البحر ماشية تتمخطر كما قالت خالدة الذكر داليدا.

– أهل مصر عيونهم سود ولابسين عقود فلّ وياسمين كما قالت خالدة الذكر داليدا برضه :))

– فيه حاجة اسمها نضارة حفظ نظر.

– اللاصقة السحرية والسيجارة الإلكترونية.

– أي حد بيكتب كلام مش مفهوم أديب، وكل واحد من النوعية دي له الحقّ إنه يبقى متعجرف ويتريق على خلق الله، على أساس إنه مخلوق من مارج من نار.

– محمد الوكيل ما بيفهمش حاجة وبارانويد وسلفيو-فيليك :))

– محمد الوكيل كاتب رائع وعظيم ومدوّن ملوش حل :))

– اللي أنا كتبته ده كله تدوينة :)))

محمد الوكيل

A.M.Revolution

Advertisements

One thought on “خرافات شائعة (1) (عن الفن والطب والدين والرجالة والبنات والوكيل وأشياء أخرى)

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s