بسم الله الرحمن الرحيم
مش وقته.. نقعد نتابع أخبار نزلاء بورتو طرة، بيلبسوا إيه وبيغيروا كام ترنج في اليوم ومعاهم موبايلات ولا لأ وبيدخلوا الحمام كام مرة في اليوم ونستفسر عن صحتهم ونقعد نترعب لو حد منهم مشتبه في إنه يخرج!!
مش وقته.. نقعد نتابع فرح الأمير ويليام ونسيب أخبار الثورات العربية والنضال الشريف لشعوب إخواننا في سوريا وليبيا واليمن والبحرين ونحاول ندعمهم مادياً أو معنوياً على الأقل..!
مش وقته.. نتخانق من دلوقت خناقة سخيفة وهمية اسمها (إسلامية ولا علمانية) على أساس إن حاجة من الاتنين هتحصل بكرة، وعلى أساس إن مصر هي السعودية أو إيران أو أوروبا!!
مش وقته.. نقعد ندور على مكاسب مؤقتة بسيطة ونحاول نركب موجة الثورة ونتاجر بيها.. البلد بلدنا ولينا كلنا، ومعادش فيه مكان لفاسد ولا لمستغل ولا لحرامي!
مش وقته.. نقيم محكمة لكل واحد كان ضد الثورة ونسب ونلعن ونصمه بالعار للأبد، أو نركز مع كل واحد بيسبح بحمد مبارك وعاوز يروح يركع تحت رجله لو يطول.. إحنا أكبر وأسمى من كده بكتير.. إحنا غيرّنا العالم كله، مش وقت الاهتمام بالتافهين وتفاهاتهم!
مش وقته.. نتريق على بعض! نقعد نطلع القطط الفطسانة في بعض ونكرّه بعض في بعض!! كلنا مصريين على فكرة لو إنتم مش واخدين بالكم، وبنمشي على نفس الأرض وبنتنفس نفس الهواء وبناكل نفس الأكل وبنشارك نفس الهم مع بعضنا.. هاه؟!
مش وقته.. نخوّن بعض!! لما يبقى كل واحد قادر يشوف اللي جوه قلب كل واحد ابقوا خونوا بعض براحتكم!!
مش وقته.. نبص على تفاهات ونهتم بمين كسب في أراب جوت تالنت ومين قال إيه امبارح ومين عاد ومين سوّى، ونقعد على الفيس وتويتر نشتغل شغل حريم وننمّ عن كل واحد شوية ونتكلم عن كل واحد شوية وإحنا قاعدين مش بنتحرك!!
مش وقت ده كله..!! عندنا بلد عاوزة تتبني وثورة عاوزين نحافظ عليها ونبقيها حيّة.. ركزوا يرحمكم الله!
محمد الوكيل
A.M.Revolution
كتاب الظلال 